Уарзты тæгтæй нывæзт удыхъæд

УФ-йы Фысджыты цæдисы уæнг, прозаик ДЗАБАЙТЫ Таисæйыл сæххæст 85 азы. Уый фæдыл Дзæуджыхъæуы Центрон библиотекæйы уыд йе сфæлдыстадон изæр. Æрбацыдысты йæм нæ республикæйы Фысджыты цæдисы, зонадон æмæ педагогон интеллигенцийы минæвæрттæ, студенттæ, скъоладзаутæ æмæ чиныгкæсджытæ.

Таисæйы цард, фæллой æмæ сфæлдыстадон фæндаджы тыххæй изæры райдайæны радзырдта библиотекæйы бæстæзонæн хайады сæргълæууæг, РЦИ-Аланийы культурæйы сгуыхт кусæг Дзугаты Риммæ.

Фыссæг цард куыд æнкъары, йæхи удыхъæд цы уарзты тæгтæй нывæзт у, уый зыны йæ уацмыстыл: «Сидзæртæ æмæ сидзæргæстæ», «Донхæрис», «Балладæ фондз æфсымæрыл»-ы, радзырдты архайджытæ цавæр зондыл хæст сты, сæ хъысмæт цавæр уднывтыл карст у, уый тыххæй фембæлды йæ хъуыдытæ загъта РЦИ-Аланийы Фысджыты цæдисы сæрдары хæдивæг Скъодтаты Эльбрус.

 Уый куыд бафиппайдта, афтæмæй Таисæйы роман «Сидзæртæ æмæ сидзæргæстæ»-м гæсгæ, Кæсæг-Балхъары газет «Горянка»-йы сæйраг редактор, УФ-йы Журналистты æмæ Фысджыты цæдисты уæнг Зæринæ Канукова сарæзта пьесæ. Таисæйы тыххæй ма сæ хъуыдытæ загътой филологон наукæты доктор, ЦИПУйы профессор Бекъойты Валодя, зындгонд скульптор Дзбойты Михал, журнал «Ирæф»-ы сæйраг редакторы хæдивæг, поэт Колыты Витали.

Уыдон фæнысан кодтой, йæ уацмысты Къесаонон кæй у реалист, хи аив хъуыды нывæндæг. Таисæйы уацмысты хъомыладон ахадындзинадыл та уыд фембæлды сæ ныхас УФ-йы Фысджыты цæдисы уæнг Соттиты Риммæ æмæ ахуыргæнæг Хæллаты Азæйæн. Фембæлдмæ æрбацæуджытæн зæрдиаг арфæ ракодта Дзæуджыхъæуы Центрон библиотекæйы директор Цъæхилты Зæлинæ.

 Юбилярæн та саккаг кодта арфæйы фыстæг æмæ уардиты баст. Эстетикон хъомылады центр «Сфæлдыстад»-ы инструменталон ансамблы æвзонг музыканттæ уазджытæ æмæ фысымты зæрдæтæ барухс кодтой сæ аивадæй. Сæ разамонæг æмæ концертмейстер — РЦИ-Аланийы адæмон артисткæ Агънаты Земæ æмæ Дзускуаты Зæлинæ. Библиотекæйы кусджытæ бацæттæ кодтой Дзабайты Таисæйы чингуыты равдыст.

 Гасанты Валерий

Добавить комментарий

Ваш адрес email не будет опубликован. Обязательные поля помечены *